saa.Ns lete huye bhii Darataa huu.N

Sponsored Links

saa.Ns lete huye bhii Darataa huu.N
ye na samajhe.n ki aah karataa huu.N

bahar-e-hastii me.n huu.N misaal-e-hubaab
miT hii jaataa huu.N jab ubharataa huu.N

[bahar-e-hastii = ocean of life]
[misaal-e-hubaab = like a bubble]

itanii aazaadii bhii Ganimat hai
saa.Ns letaa huu.N baat karataa huu.N

sheKh saahab Khudaa se Darate ho
mai.n to angrezo.n hii se Darataa huu.N

aap kyaa puuchhate hai.n meraa mizaaj
shukr allaah kaa hai marataa huu.N

ye ba.Daa aib mujh me.n hai ‘akbar’
dil me.n jo aaye kah guzarataa huu.N

Sponsored Links